Send Thoh sha ngi

Home » Ka Sla Banyngkong »News1

 

  • Kum ka miaw ba ap khnai kurup snar NDFB ki pulit Meghalaya na thain Polo

    Thmu kidnap bad dawa ransom ki lehnoh
    Khubor Dongmusa
    SHILLONG : Dei namar ka jingpeitngor ki bor pulit ba ka Meghalaya ka la kham lait na ki lehnoh nongpyntriem bad na ki jingleh kam be-ain jong ki, ba kynthup ia ki jingdawa tyngka bym hok bad ia ki kam kidnap ruh.
    Hynrei wat lada na ka liang ki bor pulit ka Meghalaya ki dang pietngor kliaw, na ka liang jong ki lehnoh nongpyntriem kim pat sangeh ban sni ia ka Meghalaya da ka jingthmu ban ioh lute bad ban kidnap briew ruh. Hynrei namar ka jingpeitngor bad jinglah jong ki bor pulit ki jingleh jingkam jong kine ki lehnoh ki la pulom lut baroh.
    Ha kane ka Sngi u Blei ba la dep, ka 10 tarik u Kyllalyngkot, 2010, ki bor pulit jong ka Meghalaya hapoh ka jingialam jong u Superintendent of Police (Crime), u Bah Vivek Syiem, ki la lah ban pynpaw ba wat lada ki hynniew ngut ki lehnoh nongpyntriem, ba kynthup ia ki ar ngut ki ehrang jong ka National Democratic Front of Bodoland (NDFB), u Manthos Daimary, ba 25 snem ka ryta, bad u Bijoy Sujunry, ba 26 snem ka ryta, kiba ki pulit ki suba ki dang iadon kti bha bad kane ka seng lehnoh, ki la pyrshang ban thew bad ban tynjuh ia ki pulit jong ka Meghalaya, ki la shem ym ka jingduna hynrei ka jingpeitngor kaba kham palat ban ia ka jong ka miaw haba ka ap thap khnai!
    Shen hadien ba ki bor pulit jong ka East Khasi Hills District ki la ioh jingtip na ki nongsngap siar jong ki ba don ka kynhun ki lehnoh nongpyntriem kiba thmu kidnap ia u khun jong uwei u mahajon, u ba don ‘business interest’ ha Assam ruh, da ka jingthmu ba kin ioh dawa tyngka ‘ransom,’ ki bor pulit ki la pynap da ka shrip, ha ka jaka iakynduh jong kine ki lehnoh nongpyntriem, ha jaka ieng bos ha madan Polo, ha kaba ki pulit ki la ioh kem shwa saw ngut na kine ki lehnoh katba ki dang iasylla ban leit kidnap ia u khun jong u tei u mahajon ha ka janmiet jong ka Sngi u Blei, ka 10 tarik u Kyllalyngkot, 2010 hajan madan Polo hangne ha nongbah Shillong.
    Ki jingphla kiba ki pulit ki la ioh na kine ki saw ngut, u Mantosh Daimary, u Bidul Narzary, u Khomtha Daimary bad u Bijay Sugnary, ki la ialam ia ki pulit sha kawei ka karkhana kali kaba don ha Saw Phurlong hajan ka jaka ia kaba la tip kum ka ‘Bangladesh colony’ hajan madan Polo.
    Ha kane ka karkhana kali ki pulit ki la pynap sa kawei ka jingriam kaba la iarap ruh ia ki la ioh kurup ia kawei ka kali Maruti Van bad ioh kem ruh ia u trai jong ka, u Nickson Khang uba dei u Thangkhul Naga.
    Ryngkat bad u trai jong kata ka Maruti Van ki pulit ki la ioh kem ruh ia u driver jong kane ka kali, u R S Somiror bad ia u Gopal Roy, uba dei u khar Bengali.
    Ka plan kaba kine ki lehnoh ki la pynkhreh ka long ban leit sha iing jong uwei u mahajon ynda la premmiet. Ka jingthmu jong ki ka la long ban leit kem kurup ia u khun jong une u mahajon bad ban rong noh ia u ha kane ka Maruti Van kaba ki pulit ki la ioh kem.
    Ynda ki la ioh kurup bad rong jubor ia u khun jong u ta u mahajon, kine ki lehnoh nongpyntriem ki la mut ban rah ia une khynnah sha ka jaka rieh jong ki ha Assam.
    Ryngkat bad kane ka jingleh be-ain, ka jingthmu jong kine ki lehnoh ka long ban phah da ka shithi dawa tyngka sha uta u mahajon ryngkat bad ka jingmaham ba lada um siew pynkloi u lah ban ym iohi shuh ia la u khun.
    Imat ba dang bun u khaw, une u mahajon, uba ki pulit kim kwah ban pynpaw kyrteng, u la lait na ka apot sep sngi. “Donbok ba ngi la ioh jingtip lypa shaphang kane ka jingthmu batriem jong kine ki ‘riew dakaid lym kumta kine ki riew runar ki la ioh ban pyndep ia kaba ki thmu,” ong ka Kong Claudia Lyngwa ka SP (City) kaba la don lang ha ka ‘press briefing’ na ka bynta ki nongpathai khubor kaba la long ha ka kamra ophis jong ka ha ka Sngi Nyngkong, ka 11 tarik u Kyllalyngkot, 2010.
    Ka Kong Lyngwa ka la ong ruh ba lada kane ka jingthmu basniew jong kine ki lehnoh ka la long kam na ka liang jong ki pulit kin shem jingeh bha ban leit thwet ia ki bad ban pynlait ia u khynnah uba ki la thmu ban kidnap.
    “Namar ba ka dei ka Sngi Sunday ruh, ka sngi ba kham duna kali bad ki briew ba iaid ba ieng ruh ki duna, ban da dei ba kane ka plan jong kine ki lehnoh ka iaid beit ngam tip shuh kaei kaban jia,” ka Kong Lyngw a ka la ong.
    Na ka jingiathuh jong ka Kong Lyngwa ka paw ba ka jingthmu jong kine ki lehnoh ka la long ban kidnap ia u khun jong uta u mahajon khnang ba kin ioh ban dawa ‘ransom’ ne tyngka.
    Haba la kylli ia ka katno kine ki lehnoh ki la mut ban dawa, ka Kong Lyngwa ka la ong “ngim pat ioh jingtip eiei shaphang kane.”
    Na ki jingtohkit jong ki pulit ka paw ba ka jingthmu banyngkong jong kine ki lehnoh ka la long ban ioh kidnap shwa ia u khun jong uta u mahajon uba ki la don jingmut ban rong ha ka kali Maruti Van kaba ki la pynkhreh lypa.
    Ka Kong Lyngwa ka la iathuh ruh ba kine ki lehnoh ki la pynkylla ruh ia ka ‘number plate’ jong kane ka kali. “Ia ka number jong kane ka kali, kaba dei ML 07 1676, ki la thoh pynrit noh da ki dak kiba kham rit khnang ba kito kiba iohi ia ka kali kin shem jingeh ban iohi ia ka number jong kane ka kali,” ong ka Kong Lyngwa.
    Wat lada na ka liang jong ki nongpathai khubor ki la kwah ban tip ia ka kyrteng jong uta u mahajon uba kine ki lehnoh nongpyntriem ki la sni, ka ka liang jong ki bor pulit ki la ong, “wat nym sngew eiei, ngim lah ban iathuh ia phi.”
    Haba ki nongpa-thai khubor ki la kylli ia ka Kong Lyngwa lada na ka liang jong ki bor pulit ki la leit iathuh ne em ia uta u mahajon uba ki lehnoh nongpyntriem ki la sni, ka jubab kaba ka la ai ka long “haoid.”
    Na ka kti jong kine ki lehnoh nongpyntriem ki pulit ki la ioh knieh ruh kawei ka ‘factory made’ 9 mm pistol ba la don kuli bad ruh ka shithi dawa tyngka kaba dang long ‘blank’ ne suda bad katto katne tylli ki ‘cell phone’
    Na ki jingiathuh jong ka Kong Lyngwa kine ki lehnoh nongpyntriem ki la wan na ki thain Byrnihat - ka thain ba kine ki lehnoh ki don ia ki ktem jong ki.
    Kumba lah ban sngewthuh na ki jingiathuh jong ki bor pulit, kine ki lehnoh NDFB ki la ioh jingiarap ruh sngewmat na ki katto katne ngut ki trai shnong jong ka nongbah Shillong. “Ki briew jong ngi ki dang tohkit ia kane ban ioh jingtip shuh shuh,” ong ka Kong Lyngwa.
    Kan iarap ban tip ba ia ka NDFB la seng ha ka 3 tarik u Risaw, 1986.
    Ha kaba nyngkong ia kane ka seng lehnoh nongpyntriem la tip da ka kyrteng Bodo Security Force (BSF) bad u nongialam jong ka u la long u Ranjan Daimary.
    Dei ha ka 25 tarik u ‘Naiwieng, 1994 ba ia ka BSF la tip noh da ka kyrteng National Democratic Front of Bodoland.Ia kane ka seng lehnoh, NDFB, la seng da ka jingthmu ban pynioh jinglaitluid na ka ri India ia ka Bodoland kaba kynthup ia ki jaka kiba don ha ki bynta ba shatei jong ka Wah Brahmaputra.


     
 
 
 
----------------------------------------------------------------------------------------------------------------------------------------------------------------------------------------------------