Khubor Dongmusa
Shillong : Ki jingpyrshah jur da u MLA ka konstitwensi Nongkrem u Bah Ardent Basaiawmoit bad 3 ki Seng Bhalang halor ki kam pynlut phut ka sorkar MPA ha ki kam thung Chairman bad Vice Chairman , u Myntri Rangbah ka jylla u Dr. Donkupar Roy u la bishar bniah ia kane bad yn wanrah noh ha ka jingiakren ka Kynhun Myntri (Cabinet) ka ban long ha ka Sngi Thohdieng ha ka 26 tarik mynta u bnai.
Kum ban shu pynkynmaw, ki Sengbhalang ba kynthup ia ka KSU, FKJGP bad ka SSSS ki la ia kynduh kyrpang ia u Dr. Donkupar ha ka 26.8.2008 bad ki la ai por ia u Myntri Rangbah hapoh shi bnai ban weng noh ia ki bym long MLA na ki shuki political adviser, chairmen, co -chairmen, vice- chairmen bad deputy chairmen kiba long tang ki jingpynbun khlieh bad jingpynlut phut kai ia ka pisa ki paidbah.
Halor kane, la ioh jingtip ba na ka liang u Myntri Rangbah u la rai ban rah beit ia kane ka kam hapoh ka Kynhun ki Myntri Cabinet ka ban long la 26 tarik. U Dr. Donkupar u lah ruh ban weng noh ia ki katto katne ngut ki riew sin hima ba la thung ha ki kam ki bym da donkam eh.
Ha kaba iakren bad ki nongialam Sengbhalang, u Dr. Donkupar u la ong ba ka long kaba eh ia u ban weng ia kiba la thung kam na ki seng sain hima kumba ka long mynta. Kumjuh ruh, u la mynjur ban shim ia ki lad na ka bynta ban pynduna noh ia ki jinglut na ka bynta jong ki. Na ka liang ki Sengbhalang ki la kren pyrshah jur ia ki jingdon ki Board bad ki Corporation kiba bam kruin ia ka jylla bad ki bym don jingphoida ei ei ia ka roi ka par ka jylla.
Kat kum ka jingiathuh ki nongialam Sengbhalang, ka jylla ka la pynlut haduh T.1 klur shi bnai tang ha kaba siew tulop bad kiwei ki jingpynlut phut kiba bat ia ki shuki sain hima. Lada kane ka sorkam kam sngap ia ki jingdawa jong ki, ki Sengbhalang kim banse ban pynlong da ka jingiakhih kaba tyngeh.
Lah ban pynkynmaw hangne ba u Bah Ardent Basaiawmoit MLA ka kongstitwensi Nongkrem u la ieng rangbah ban kren jam da ka kam, ym da ka ktien (ba eh ia kiba bun ban leh kumta) da kaba risain noh na ka shuki kabau bat kum u Chairman ka Meghalaya Minerals Development Corporation (MMDC) namar ka jing pyrshah jur ia ka “jingbun seh ki shuki ia ki nongtrei kam seng.” U Bah Ardent u la ong ba u la rah ruh ia kane ka kam hapoh ka jingialang kaba la iadonlang baroh arliang na ka MPA bad jong ka UDP ha kaba u la dawa ba dei ban weng noh ia ki jingthung kam ki bym pynmyntoi jong ki shuki sain hima.