Ki Mat Khubor
Khubor Jylla
Editorial
Ki Sports
Train Timmings
Flight Information
Archives
La wanpoi ka kynhun Australia ryngkat bad ka jingkyrmen ban jop ia ka series

MUMBAI : Ka kynhun Australia hapoh ka jingialam jong u Ricky Ponting,, dang shen ka la wanpoi ha India na ka bynta ban ialehkai ia ka test series kaba kynthup ia ki saw tylli ki jingiakhun.
Kane ka kynhun ba 15 ngut kan kilan met ha Jaipur ha shuwa ban leit sha Hyderabad na ka bynta ka jingiakhun ba saw sngi pyrshah ia ka Indian Board President XI kaban long naduh ka 2 tarik u Risaw.
Kane ka long tang kawei na ki jingiakhun kilan met ha shuwa ban sdang ka test kaba nyngkong ha Bangalore ha ka 9 u Risaw. Ia ki test kiba dang sah pat yn ialehkai ha Mohali, New Delhi bad Nagpur.
Kane ka jingwan ialehkai jong ka Australia ka la don hapdeng ka jingarta-tien namar ka jingbthei bom ha ka nongbah Delhi dang shen ha kaba palat 20 ngut ki briew ki la iap.
Ka jingbthei bom ha Marriott Hotel ha Pakistan dang shen ha kaba palat 53 ngut ki briew ki la iap bad da ki spah ngut ki la mynsaw ka la pynlong ia ka kynhun Australia ban artatien wan ialehkai sha ri India ruh.
Ha kane ka sien wan ialehkai sha India, u Ponting u ialam ia ka kynhun kaba don tang ia saw ngut ki player kiba la ialehkai teng ia ka test ha kane ka ri.
Hynrei ha ka rikod pat u long u kapten uba pynioh bun eh ki jingjop ia ka Australia ha ki jingiakhun test.
Ha ki 44 tylli ki test kiba u la ialam, ka Australia ka la shah rem tang saw sien bad artylli na kine ki dei ha ki jingiakhun pyrshah ia ka India.
Ha ka por ba ka Australia ka wan ialehkai ia ki saw tylli ki test ha ka 2004 sha India, u Ponting um shym la lah satia ban ia shim bynta ha ki lai tylli ki jingia khun kiba nyngkong bad ia ka team la ialam da u Adam Gilchrist. U la ialehkai tang ha ka test kaba khatduh kaba ka team ka la shah rem.
Kawei pat ka jingrem ha ka jingiakhun pyrshah ia ka India ka dei ha ka test kaba lai ha Perth ha ka snem kaba la lah..
Na ki 6 tylli ki series ba ka Australia ka la ialehkai ha India, ka la lah ban jop tang ia saw tylli ki jingia khun.
Ki artylli kiwei pat ki jingshah rem jong ka Australia hapoh ka jingialam jong u Ponting ki dei ha ka Ashes Series pyrshah ia ka England ha ka 2005.
Hynrei hapoh ka jingialam jong u Ponting ka Australia ka la lah ban jop haduh arsien ia ka World Cup bad ka jingjop ia ka test hapoh ka jingialam jong u ka long kham bun ban ia kiwei pat ki kapten kiba la ialam ia ka team ha palat 10 tylli ki jingiakhun.
Ha kane ka kynti u Ponting u khmih lynti ba ka team jong u kan iohrah biangia ka series wat haba ha ka jingshisha ym don uwei ruh na ki bowler ha ka team kaba mynta kiba la ju ialehkai teng ia ka test ha India. Bad ki arngut ki spinners ha ka kynhun, u Bryce McGain, Jason Kreza kim pat ju ialehkai teng ia ka test.
Ka test kaba nyng-kong kan long ha Bangalore ha ka 9-13 u Risaw, kaba ar ha Mohali ha ka 17-21 u Risaw , kaba lai ha New Delhi ha ka 29 u Risaw - 2 u Naiwieng bad kaba saw kan long ha Nagpur naduh ka 6 tarik haduh ka 10 tarik u Naiwieng.

Ai jingmut u heh barim ka PCB ban ym shaniah ha ka India
KARACHI : U Asif Ali Abbasi uba long teng myn-shuwa u heh jong ka bor pyniaid ia ka Cricket ha ka ri jong u, u la ai jingmut ia ka Pakistan Cricket Board (PCB) ban ym shaniah than eh ha ka India (BCCi) bad ban sdang wad lad noh kumno ban ieng ha la ki kjat la jong.
U Abbasi, uba long u Chief Executive barim jong ka PCB, u la iathuh ha ki nongthoh kot khubor ba ka jingshaniah palat ha ka India ka la pynsniew bad pynhiar kyrdan ia ka jingialeh kai ka ri jong u.
U Abbasi , uba la khmih lynti ba un sa shimti biang ia ka kam CEO ha ka PCB, u la pynpaw ba dei ban sangeh noh shi syndon ia ka jingshaniah ne khmih lynti ia ka jingiarap na ka India.
U ong ba kumba long ka India, ka Pakistan ruh ka dei ka dkhot ba pura jong ka International Cricket Council (ICC), kumta ka dei ban kit khia hi ia ka eh ka shon kaba ia kynduh. U ong ruh ba ka bym lah satia ban long ba yn shu khmih lynti beit na ka India ban iarap haman ki jingeh, namar kane kan ym ialah ia ka PCB shano shano ruh.
Ha ki khyndiat por kiba la leit ka PCB ka shaniah tylli beit ha ka BCCi ban iarpa ia ka haman ba ka ia kynduh jingeh. Bad ka PCB ka sah ruh ha ka jinglyngngoh ba wat hapdeng ka jingkyrshan jong ka India, ka ICC ka dang nud ban pynsangeh noh shuwa ia ka Champions Trophy kaba dei ban long ha kane ka ri mynta u bnai.
U ong ba u sngew lehrain ban pynkynmaw ia ka jingai khublei jong u Nasim Ashraf (u heh barim jong ka PCB ia ka India halor ka jing iarap jong ka ban pynkoh-nguh ia ka ICC ban pynlong beit ia ka Champions Trophy ha Pakistan, ia kaba ym shym la jia satia kumta.
Ka jingpynsangeh ia ka Champions Trophy ka dei namar ka jingsheptieng jong ki katto katne tylli ki team ban ialehkai ha Pakistan. Shuwa ia kane, ka Australia ka la kyntait ban leit ialehkai sha Pakistan na kajuh hi ka daw.
Hynrei, u Abbasi u la pynpaw ia ka jingsngew lyngngoh ba kumno ka Australia ka mynjur ban leit ialehkai sha India wat hadien ki jingbthei bom ha New Delhi ha ki khyndiat sngi kiba dang shu lah.
Kham shngaiñ ban ialehkai ha India: Ponting
Da kaba kyrshan ia ka rai jong ka Cricket Australia (CA) halor ka jingshah beit ia ka team sha India wat hadien ki jingbthei bom, u kapten jong ka kynhun Australia, u Ricky Ponting, u la ong ba ka jingpynbiang pynbit ia ki bor pahara ka pher shi katdei lada ia nujor hapdeng ka India bad Pakistan, bad ba ka team jong u ka kham sngew shngain ban ialehkai ha India ban ha Pakistan. U ong ba ka shong ruh ha ka rai jong ka CA ban phah ia ka team ban leit ialehkai sha kano kano ka jaka. U la iathuh ruh ba ka team ka la ioh jingbit na ka tnad sorkar Australia kaba dei peit ia ka Foreign Affairs, Trade bad Independent Security ban leit ialehkai sha India.
Lait thaw ka team England, South Africa
SYDNEY : Ki bor pyniaid ia ka Cricket ha Pakistan ki shim ia ka jingbthei b om ha Islamabad dang shen kum ka jingjia kaba kthang tam ia kiba ngat ha kane ka lanot, katba ka Australia bad New Zealand pat ki sngew heh mynsiem ia ka jinglong phikir jong ki ban leit iuh kjat sha kane ka ri ka bym don satia ka jingshong shngain.
Naduh nyngkong hi ki player jong ka Australia bad New Zealand ki la pynpaw ia ka jingartatien ban leit iashimbynta ha ka Champions Trophy kaba dei ban long mynta u bnai ha Pakistan namar ka jingbthei bom kaba khah khah ha kane ka ri.Lada dei ba ka Champions Trophy ka iaid beit kumba la thmu, ka team South Africa bad England ki dei ban sah ha Marriott Hotel ha Islamabad kaba la shah pynjulor dang shen ha ka jingbthei bom kaba radbah ha kaba palat 40 ngut ki briew ki la iap bad da ki spah ngut ki la mynsaw.
Ka Marriott Hotel ka die ka jaka sah jong ki team b ar ri kiba wan ialehkai cricket sha Pakistan.
Jop biang u Powell
U nongbat ia ka world record ha ka jingiamareh 100 meter, u Asafa Powell, u la jop biang ia kane ka jingia kob mareh da kaba pyndep ha ka por 9.89 sekon ha ka jingiakhun kaba dang shu dep long shen ha Szczecin. U Kime Rodgers (10.23) jong ka America u la wan ba ar bad u Andrew Hinds (10.41) jong ka Barbados u la wan ba lai.
Kynriah jingia khun na Delhi
Ka India ka la pynkyn-riah noh ia ka lympung iakhun Badminton World Champions, kaba dei ban long la shem snem ha Delhi, sha Hyderabad, namar ka jingbym lah ban pyndep ia ka jaka ialehkai kaba la tei khnang na ka bynta ka Commonwealth Games 2010. Ia kane ka jingpynkynriah la mynjur ruh da ka bor pyniaid ia kane ka jingialehkai ha ka pyrthei.
Ioh khusnam ki nongjop Olympic
Ki lai ngut ki nongjop takma Olympic jong ka ri India kiba kynthup ia u Abhinav Bindra, Vijender Kumar bad u Sushil Kumar ki la iohpdiang ia ka khusnam pisa na ka sorkar kmie. U Bindra , uba jop ia ka takma ksiar, u la ioh T.50 lak, katba ki arngut ki Kumar pat kiba jop ia ka takma rnong , ki la ioh mar T.20 lak.
Ap ka PCB ia ka series bad ka West Indies
LAHORE : Ka jingpynsangeh ia kawei ka jingiakhun hadien kawei pat na ki daw jong ka jingbym shong shngain ha ka ri ka la pynkhuslai jingmut shi katdei ia ka bor pyniaid ia ka cricket ha Pakistan (PCB) bad mynta ka PCB ka ap khmih lynti ryngkat bad ka jingkyrmen ba ka West Indies kan mynjur ban wan ialehkai ia ka test series sha kane ka ri. Ka PCB ka hap ban ap tad haduh ban da kut une u bnai ban tip la ka West Indies kan mynjur ne em ban wan ialehkai ia artylli ki test ha u Naiwieng. Ka PCB ka la khot sngewbha ia ka West Indies Cricket Board (WICB) ban phah ia ka team ban ialehkai ia artylli ki test mar ia kut ka one day series hapdeng kine ki artylli ki ri ka ban long ha Abu Dhabi ha ka 12-16 u Naiwieng. Ka WICB ka la iathuh ba kan sa pynthikna ha kaba kut jong une u bnai.
Ka series India, Pakistan
LAHORE : Ia ka test series hapdeng ka India bad Pakistan yn pynsdang noh kham kloi ha u snem uban wan. La khmih lynti ba ka kynhun India kan poi ha Pakistan ha ka saw tarik u Kyllalyngkot ha kaba kan ialehkai ia lai tylli ki test , san tylli ki one day bad kawei ka Twenty 20. Ka one day series kan long hadien ba la kut ka test bad ba ia ka jingia khun Twenty 20 yn pynlong ha ka por ba dang iaid ka jingialehkai one day.
Lahduh ki ‘thei India ha Asia
MADURAI : Ka India ka la jop biang ha ka sien kaba lai ia ka nam lahduh ha ka lympung ialehkai Asian Kabbedi Championship ha ka liang ki kynthei hadien ba ka la lah ban pynliem ia ka kynhun Iran da 43 - 22 ha ka phainal kaba la long ha Race Course Ground ha Madurai dang shen. Ka India ka la jop ia baroh ki jingiakhun ha kane ka lympung iakob kaba la iashim bynta da ki 10 tylli ki ri Asia bad ka la iohkhur ruh ia ka takma ksiar ryngkat bad ka khusnam pisa kaba long T.1 lak hadien ka jingjop ia ka Iran ha ka phainal. Lyngba kane ka jingjop ki player India ki la ioh khur ruh ia ka khusnam pisa kaba long T. 5 lak marwei kaba la ai da PM Manar.
Yn ialehkai ka Germany, Holland ha Punjab
CHANDIGARH : Ka lahduh ha ka Olympic ka Germany, nangta ka lahduh ha Europe ka Netherland bad ka Pakistan kin iashim bynta ha ka lympung iakhun hockey hapdeng ki saw tylli ki ri kaba la tip kum ka Punjab Gold Cup kaban long ha ka 5 haduh 14 tarik u Jymmang lashem snem. Ia kane ka jingiakhun kaban pyniaid da ka Punjab Sports Department, la bei da ka International Hockey Federation bad yn pynlong ha Sector 42 Hockey Stadium, Chandigarh. Ia ka phainal yn pynlong ha Surjit Hockey Stadium ha Jalandhar.
Ioh khusnam pisa ka Saina
HYDERABAD : U Myntri Rangbahduh jong ka Andhra Pradesh, u Dr. Y..S. Rajasekhara Reddy u la pynbna ban ai khusnam pisa kaba long 20 lak tyngka ia ka nongialehkai badminton ka Saina Nehwal, kaba dang shu jop shen ia ka Grand Prix Gold Championship. Une u Myntri Rangbah u la ai khublei kyrpang ia ka Saina halor kane ka jingjop jong ka bad ruh ha kaba iadei bad ka jingiohrah ia ka nam kum kata ka thei India kaba nyngkong eh ban jop ia artylli ki khusnam lahduh ha ka Grand Prix ha ka jingialehkai badminton. Kane ka nongialehkai na Hyderabad ka la iohpdiang ruh ia ka khusnam pisa kaba long 5 lak tyngka ha kaba iadei bad ka jingiashim bynta ha ka Olympic kaba dang shu dep long shen ha Beijing, China.
Yn shna history ka Formula One ha Singapore shen
SINGAPORE : Ha kane ka taiew ka Singapore kan sa shna ia ka history kaba thymmai ha ka liang ka jing iakob race kali Formula One namar ba ha ka sien kaba nyngkong eh ia kane ka jing iakob race kali la pynlong mynmiet.
Kane ka sorbah kaba rit ka la ioh ia ka hok ban pynlong ia ka jingiakob race kali Formula One ia kaba yn tip ruh kum ka Singapore Grand Prix na ka bynta san snem, bad lah ruh ban pyn jlan haduh ka 2017, hadien ba ka la mynjur ban pynlong ia kane ka jingiakob ha ka por mynmiet khnang ba ki briew kiba ieit ia kane ka jing ialehkai ha shi tyllup ka pyrthei kin ioh ban peitkai .
Kane ka jingiakob kaban long ha kane ka Sngi U Blei kan long ruh ka sien kaba nyngkong eh ba ia ka race Formula One la pynlong hapoh ki surok jong ka sorbah Asia, ha kaba don ia shibun ki jingtei kiba pawnam kum ka St. Andrews Cathedral bad ka The Padang..
Haba sah sa tang saw tylli ki race ha kane ka aiom, u driver jong ka McLaren u Lewis Hamilton u tam dang da shi point ia u Felipe Massa jong ka Ferrari na ka bynta ka nam lahduh ha ka liang ki dribar mynta ka snem.Hynrei ka jing pynlong ia kane ka race ha ka por mynmiet ka la pynmih ruh ia shibun ki jingkhuslai namar ki draibar ba ju mlien ban niah ia kine ki kali kiba sted tam ha ka pyrthei tang ha ka por mynsngi, ym ha ka por mynmiet.
Ki nongpyniaid ki la iathuh ba haduh 1500 ki lighting projectors - ba la pyniaid da 12 jur ki kor diesel generator - kin pynshai ia ka jaka ban pynlong ia kane ka race, ka Marina Bay Track, kaba ka jingjrong ka long 5.067 kilometer. Ka jing shai jong kawei kawei ka projector ka long saw shah ban ia ki light ba ju pynshai ha ki football stadiums.
U Leong Yue Kheong, uba long u director jong ka F1 Projects ha Singapore Tourism Board, u la iathuh ba la dep pynbiang pynbit ia baroh ki jingdon-kam ban pynthikna ia ka jing long shngain jong kane ka jingiakob bad ruh ban pynduna ia ka jingthaba jong ki light kaban ym ktah ia ki draibar khamtam lei lada jia ba hap slap. U la iathuh ba ia ki light projector la shna ha kata ka rukom bad kin ym pynthaba ia ki draibar. U ong ruh ba ka long kaba shisha ba yn ym lah lait satia na ka jingthaba khamtam lei lada dei ba slap, hynrei la pyr-shang kumno ban kham pynduna ia kane.La khmih lynti ba kane ka Singapore Grand Prix kan khring ia shibun bah ki nongpeitkai namar ba ka pyrthei iakob race kali ia ka Singapore la ju tip kum ka ‘Monacco of the East’

 
NEWS OPTIONS ::
>> EMAIL THIS ARTICLE
>> PRINTER FORMAT
>> LETTER TO EDITOR

 
[Home] [The Sentinel] [Ajir Asom] [The Sentinel(Hindi)] [Samay Prabah] [Khubor Jylla] [Editorial] [Ki Sports] [Train Timmings] [Flight Information] [Classified]
[Cinema] [Archives] [Feedback] [About Us]
 
Copyright © 2001 Omega Printers and Publisher, Guwahati.