Khubor Dongmusa
Shillong: “Ka politiks,” ong ki ‘riew shemphang, “ka dei ka saian jong ki bym-lah long” ne ka “science of the impossible” kumba ki ong ha ka ktien Phareng. Kumta ruh kan long, sngewmat ha Meghalaya ha kaba ka “jingbym-lah long,” ba baroh shi katta, mynta “kan sa lah ban long” da ka jingiasynrop noh, ym jong ka UDP, HSPDP ne KHNAM, hynrei jong ka seng Congress bad ka NCP ban pynlong sorkar thymmai noh shen hapoh ki shi taiew ar taiew ban wan!
Kumba ka paw na ki kotkhubor bad ruh na ki jingtip kiba u Dongmusa u la lah ban swar na ki heh NCP hangne ha Shillong hynnin ka sngi, ka Sngi Balang, ka 6 tarik u Jymmang, 2009, u President ka UDP, u Dr Donkupar Roy, u la pynpaw “ia ka jingbym kmen” jong u ban iohi ia ki khubor kiba pynpaw ba ka seng Congress bad ka NCP ki lah ban iasynrop lang ban pynlong sorkar thymmai ha Meghalaya hadien ba la weng noh ia ka jingsynshar president hapoh shi sngi ar sngi.
U Dr Donkupar ula iathuh ruh ba “katto katne ngut ki leader jong ka UDP” kin sa iakynduh ha ka janmiet jong ka Sngi Balang, ka 6 tarik u Jymmang, 2009 ban iakren halor kane ka kam. “ ‘I’m not happy’ ba ka politiks ha Meghalaya kan long ‘in this way,’” u la ong.
Ka paw shai ruh ba kine ki khubor shaphang ka jingiasynrop ka seng Congress bad NCP, ban pynlong sorkar thymmai, ki la pynbynniaw shibun ia u Dr Donkupar Roy uba la pynpaw ia ka jingsngewsih jong u ban iohi “ba ka politiks ha Meghalaya kan long kumne ha kaba “baroh ki ‘believe in betrayal,” bad ha kaba long “ ‘opportunistic.’”
Halor ka jingkylli la u Purno A Sangma u la iathuh ne em ia u shaphang ka jingshah khot jong u da u Prime Minister, Dr Manmohon Singh, ban wan sha Delhi?
“Em, u khlem ‘contact’ re,” u la ong da kaba iathuh ruh ba dei tang ha kato ka sngi ba u mih na Shillong (ka Sngi Saitjain ne Sngi u Blei) ba u la ioh ban kren ia u. “Lada don eiei, ngan sa pyntip,” la ong u Purno Sangma ia u Dr Donkupar Roy.
Hadien kata, la iathuh u Dr Donkupar Roy, “nga la pyrshang ban phone ia u, hynrei ngam ioh.”
Namar ha ki kotkhubor ka paw ba dei na ka daw jong u Bah Donkupar Massar, uwei na ki MLA indipenden ba la pynia-synrop ia lade bad ka MPA, uba pyrshah ia u Bah J D Rymbai ban long u nongialam jong ka parliamentary party ka UDP, ba ka NCP ka pynkhein jutang kumne, u Dr Donkupar Roy u la ong “ha ki khep ba kum kine, kam bha ban peit ia ki jingduna jong-no jong-no ruh.”
Na ka liang jong uwei na ki ‘riew dkhot ba kham paw jong ka NCP, u bym shym la kwah ban pynpaw kyrteng, u la kubur ba ka don ka jingpyrshang da ki heh jong ka seng Congress bad NCP ha Delhi ban pyniasynrop ia kine ki ar seng ban pynlong sorkar ha Meghalaya ruh.
Kumba lah ban sngewthuh na ka jingiathuh jong une u nongialam jong ka NCP, ka daw kaba la pynlong ia ka NCP ban pyrkhat iasynrop noh bad ka seng Congress ban ioh pynlong sorkar thymmai, ka dei namar ka la ngiah hi shoin ia ki indipenden kiba long ka daw jong ka jingb’ymneh ki sorkar ha Meghalaya.
Une u nongialam jong ka NCP u la kubur ruh ia ki khubor ba ong ba u Purno Sangma u la shah khot da u President ka seng jong u, u Sharad Pawar, ban wan iakynduh ia u Prime Minister, Dr Manmohon Singh, ha Delhi.
Kumba lah ban sngewthuh, u Sharad Pawar ryngkat bad u Purno Sangma, hadien ba ki la ioh ia ka jingkhot sngewbha, ki la leit iakynduh ia u Dr Manmohon Singh, ha ka Sngi Ba-ar, ka 5 tarik u Jymmang, 2009.
Namar ka jingsynshar President, katkum ka jingiathuh u Purno Sangma, kan kut noh ha ka 19 tarik jong une u ‘nai Jymmang, 2009, ha kane ka jingiakynduh bad u Dr Manmohon Singh la don ruh ki jingiakren shaphang ka jinglong jingman jong ka politiks ha Meghalaya.
Wat lada um shym iathuh ia kaei kaba la iakren, la lah ban sngewthuh na ki jingpynpaw jong u Purno ba ki jingiakren ki dei halor ki lad ki lynti ban pynkut noh ia ka jingb’ymialah poi shaei shaei ha ka jinglong jingman ka politiks ha Meghalaya.
Na ki lad khubor ba la ioh ka paw ruh ba u Prime Minister Dr Manmohon Singh u la pynlong jingiakren ruh bad u chief minister barim ka Meghalaya, u Dr D D Lapang bad katto katne ngut ki MLA.
Ha kine ki jingiakren la iapyrkhat ruh ban pynkut noh hapoh shi sngi ar sngi ia ka President’s Rule ha Meghalaya bad shen hadien kane ban pyndon noh da ka sorkar ba la pyniasynrop lang da ka seng Congress bad ka NCP.
La lah ban sngewthuh ruh ba kine ki jingkylla kin wan namar ha seng Congress ha Delhi ka donkam haduh katta katta ia ka seng NCP ban ioh pynlong sorkar biang shen hadien ka jingpynmih result ha ka 16 tarik jong une u ‘nai Jymmang, 2009.
Ia kine ki jingkylla, sngewmat, ym baroh na ka liang jong ka seng Congress ha Meghalaya ki kloi ban pdiang. Ka daw kumba lah ban sngewthuh ka dei namar bun na kito kiba khmih lynti ban ioh shuki minister ki lah ban duh namar kiban long minister kin dei ruh na ka seng NCP.
Lada kane ka jia, don kiba la kdew, uban ioh nong eh yn dei u Bah Paul Lyngdoh, u President bad MLA ka KHNAM. “Kine ki jingjia kin long ym tang ka jingpynksan ia kaei kaei kaba u la pynpaw baroh shi katta, hynrei pynlong ruh ia u ban ioh shuki minister biang wat ha kane ka sorkar Congress-NCP kaban dang wan ruh,” la pynpaw kiba bun.
Na ka liang jong ki NCP, hangne ha Meghalaya, kumba lah ban sngewthuh, kim kmen ban iohi ia u Bah Paul Lyngdoh ba un don ha kane ka sorkar bathymmai. Ka daw ka dei namar ki jingkynnoh bym don nongrim jong u.
Kine ki NCP ki la iathuh ia u Dongmusa ba shen kin sa pynmih bad pynbiang da ki kot ki sla ban pynpaw ba ki jingkynnoh jong u Bah Paul Lyngdoh ia u Purno Sangma ki long ym tang ki b’ym don nongrim, hynrei ki bym don kano kano ka jingshisha.
Wat na ka liang jong ki katto katne ki MLA ka seng Congress ruh ki la pynpaw ia ka mynsiem bynniaw jong ki ban tip ba shen ka seng Congress bad ka NCP kin iasynrop lang ban pynlong sorkar.
Uwei na kine ki MLA, u bym kwah ban pynpaw kyrteng, u la ong, “ka jingthmu ba kongsan hi jong u Purno Sangma ka long beit tang na ka bynta ban pynsuk pynaram ia ki khun jong u kiba don ha ka politiks.”
“Hynrei, la katta ruh,” u la ong, “nga kloi ban pdiang ia kane ka sorkar ban wan khnang ba ngin lait na ka ilekshon shiteng samoi kaban bam palat ym tang ia ka tyngka bakordor jong ka sorkar, hynrei jong ngi ki MLA ruh.”
Lait tang na ka liang jong ka UDP, ym pat ioh jingtip eiei na ka liang jong ka HSPDP. Namar lada kine ki jingkylla ki wan kane ka seng kan ym don shuh ha ka bor bad kan hap don noh ruh ha ka liang pyrshah.
Lada kine ki jingkylla ki wan, pynpaw uwei u MLA, wat u Speaker jong ka dorbar thaw-ain ka Meghalaya, u Bah Bindo Lanong ruh un shah ktah.
Ka sorkar jylla bathymmai kan ym kwah ba u Bah Bindo Lanong un dang iai neh kum u speaker. “Khlem pep kan kwah ban ioh da u speaker uban don sha ka liang jong ka,” la ong une u MLA uba dang kynmaw ruh lehse ia ki jingjia kiba la jia ha ka 17 tarik u Lber, 2009 ha iing dorbar thaw-ain ha kaba san ngut ki MLA ki la shah pynduh ia ka hok jong ki ban thep vote ha ka jingiatynjuh bor hapdeng ka MPA, ba la pynlong da ka NCP, UDP, HSPDP bad ki indipenden, bad ka MUA ba la pynlong da ka seng Congress bad ki indipenden. .