Ki Mat Khubor
Khubor Jylla
Editorial
Ki Sports
Train Timmings
Flight Information
Archives
Paw eh u Dhoni ha ka ODI, u Gambhir - Harbhajan ha ka test

KOLKATA : U kapten jong ka India, u Mahendra Singh Dhoni, u dang bat hi ia ka kyrdan nyngkong ha ka liang ki batsman ha ka jingia lehkai one day. Kat kum ka thup khein kyrdan Reliance Mobile ICC ODI Championships.
U Yuvraj Singh (4) bad u Virender Sehwag (7) ki long ki arngut kiwei pat ki batsman jong ka India kiba iohrung ha ka thup top 10. Hynrei ym don uwei ruh u bowler jong ka India hynrei ym don uwei ruh u bowler jong ka India u ban iohrung ha ka thup top 10.U Yuvraj Singh u wan ba lai ruh ha ka liang ki all rounder ha ka jing ialehkai one day.
Ha kaba iadei pat bad ki team, ka India ka dang neh hi ha ka kyrdan kaba lai da kaba iohkhur 122 point. Ia ka kyrdan nyngkong dang bat hi da ka South Africa (126), bud pat sa ka Australia (124) ha ka kyrdan kaba ar.
Kiba bud ia u Dhoni ha ka liang ki batsman, ki long ki arngut ki player jong ka West Indies, u Chris Gayle bad u Shiv-narine Chanderpaul, ha ka kyrdan kaba ar bad kaba lai.
Ha ka liang ki bowler pat ia ka kyrdan nyng kong la bat da u N. Kulasekara jong ka Sri Lanka, bud sa u K.Mills ha ka kyrdan kaba ar bad u M.Muralitharan jong ka Sri Lanka ha ka kyrdan kaba lai.
Ha kaba iadei pat bad ka jingialehkai test, u Gautam Gambhir bad u Harbhajan Singh ki long tang ma ki arngut ki player India kiba iohrung ha ka thup top 10 ha ka liang ki batsman bad ki bowler. U Gambhir u don ha ka kyrdan kaba saw ha ka liang ki batsman, katba u Harbhajan pat u don ha ka kyrdan kaba 6 ha ka liang ki bowler.
Ia ka kyrdan nyng-kong ha ka liang ki batsman la bat da u Shivnarine Chanderpaul jong ka West Indies, bud pat sa u Younis Khan jong ka Pakistan bad u Kumar Sangakkara jong ka Sri Lanka ha ka kyrdan kaba ar bad kaba lai.
Ha ka liang ki bowler ha ka jingialehkai test, wan nyngkong u M. Muralitharan jong ka Sri Lanka, bud pat sa u Dale Styen jong ka South Africa bad u Mitchel Johnson jong ka Australia.
Ha ka liang ki team, ka India ka don ha ka kyrdan kaba lai da kaba iohkhur 117 point. Ia ka kyrdan nyng kong dang bat hi da ka Australia, bud pat sa ka South Africa ha ka kyrdan kaba ar.

Hynriew ngut ki player thymmai ha ka kynhun India
KOLKATA : Ka India ka la pynrung haduh 6 ngut ha ka kynhun kaba 15 ngut kaban leit aireng ha ka ICC World Cup Twenty 20 kaban long ha England naduh ka 5 tarik u Jylliew mynta ka snem.
Ia ka kynhun India, kaba jop ia ka nam lahduh ha South Africa ha ka 2007 yn ialam biang da u Mahen-dra Singh Dhoni bad ia ka kyrdan vice captain pat la pynkhamti ha u Virender Sehwag.
Ki nongjied ne selectors ki la pynrung ha ka team ia san ngut ki batsman, 5 ngut ki fast bowler, arngut ki spinner , arngut ki all rounder bad uwei u wicket-keeper.
Ka kynhun ki selectors, kaba la lam khmat da u K. Srikanth, ka la kyntait noh ia 6 ngut ki player kiba don mynta bad ka team kaba jop ia ka thong lahduh ha ka 2007. Kine ki bym shym la shah jied ha kane ka kynti ki kynthup ia u Ajit Agarkar, Sreesanth, Joginder Sharma, Piyush Chawla, Robin Utthapa bad u Dinesh Karthick.
Ki player kiba la pynrung bujli pat ha ka jaka jong kine ki kynthup ia u Suresh Raina, Ravindra Jadeja, Pragyan Ojha, Zaheer Khan, Ishant Sharma bad Praveen Kumar.
Ka kynhun ba pura ka kynthup ia :
Batsman : Virender Sehwag (vice captain), Yuvraj Singh, Gautam Gambhir, Suresh Raina, Rohit Sharma, Ravin-dra Jadeja ; Wicketkeeper: Mahendra Singh Dhoni (captain); All rounders : Irfan Pathan, Yusuf Pathan; Spinners: Harbhajan Singh, Pragyan Ojha; Medium pacers: Zaheer Khan, RP Singh, Ishant Sharma, Praveen Kumar.

Khein kordor u Afridi ia ka bat u Sachin
KARACHI : U Shahid Afridi u la pynpaw ba u la khein kordor haduh katta katta ia ka bat kaba dei jong u Sachin Tendulkar, kaba la poi ha ka kti jong u lyngba u Waqar Younis. U ong ba kane ka bat ka long kaba eh daw bha bad um kwah satia ban die ia ka.
Kane ka bat, kaba u Afridi u la shna ia ka 100 run kaba kloi eh ha ka jingialeh kai one day tang na ki 37 bol ha ka jingiakhun bad ka Sri Lanka ha u Risaw 2006, ka dei kaba ai sngewbha da u Tendulkar ia u kapten barim jong ka Pakistan, u Waqar Younis, uba hadien pat u la ai kylla ha u Afridi da kaba kitbok artad ba ka long ka bat kaba eh daw bha namar ka dei jong u player uba khraw nam eh ha ka pyrthei.
U Afridi u la iathuh ba u la iohpdiang ia shibun ki jingtyrwa ban lilam ia kane ka bat hynrei u la kyntait mardor namar u ong ym tang ba ka long ka atiar kaba eh daw bad kordor hynrei kaba kyrpang bha ruh ia u. U la iathuh ba u Waqar u la ai ha kane ka bat ha Nairobi ha ka por ba u shaj jied ban mihkhmat ha ka sien kaba nyngkong eh na ka team Pakistan. U la iathuh ruh ba u Waqar u la ong ha u ba kane ka bat ka dei kaba la ai sngewbha ha u da u Sachin Tendulkar.U la pynkynmaw ruh ba u Waqar u la ong ia u ba kane ka bat ka dei jong u player uba khraw nam bad kan pyneh daw pyneh rngiew bha ia u lada pyndonkam ia ka. U Afridi u la pynpaw ia ka jingsarong ha kaba iadei bad ka jinglong trai ia kane ka bat bad ong ruh ba da lei lei un ym die satia ia ka. U la ong ba ka rikod kaba u la shna da kane ka bat ka dang iai neh haduh mynta bad u la kamai ia shibun ki run mynta.
Iehnoh u Yousuf ia ka ICL
LAHORE : U batsman barim jong ka Pakistan , u Mohammad Yousuf, u la pynbna ba u la pynkut noh ia ka jingiadei bad ka Indian Cricket League, bad ba u kloi ruh ban ialehkai biang na la ka ri. Une u batsman ba la 34 snem ka rta u la pyniasoh ia lade bad ka ICL mynshem snem, ha kajuh ka sngi ha kaba ka Pakistan ka la pynrung ia u ha ka kynhun kaban ialehkai ia lai tylli ki test pyrshah ia ka West Indies ha Abu Dhabi. Ia ka ICL ym shym la ithuh satia da ka Board of Control for Cricket in India (BCCI) bad da ka Internation Cricket Council (ICC), kumta u Yousuf bad ki para player Pakistan kiba iashim bynta lang ha kane ka lympung iakob Twenty 20 kin ym lah satia ban ialehkai na ka ri lajong.
Ka Pakistan Cricket Board (PCB) ka la pynpaw shai ba ki player ICL ki lah ban ialehkai na la ri lada ki pynkut noh ia ka jingiadei bad kane ka lympung iakob Twenty 20. U Yousuf, uba ialehkai ia ka one day kaba khatduh eh na la ka ri ha Karachi ha u Naitung myn shem snem, u la pyniasoh ia lade bad ka ICL kum ka dak jong ka jingpyshah jur ha kaba iadei bad ka jingbym pynrung ia u ha ka team Pakistan kaba leit aireng ia ka Twenty 20 World Cup kaba la long ha South Africa ha ka 2007.
Hynrei ka kyrteng jong u Yousuf kam shym la don satia ha ka lis jong ki player Pakistan kiba leit aireng ha ka Twenty 20 World Cup kaban long ha u Jylliew mynta ka snem ha England.

Hap ialehkai biang ka Pak shabar ri
LAHORE : Haba la thikna ba ki team bar ri da lei lei ruh kin ym treh satia ban leit ialehkai kriket sha Pakistan, kumta ka Pakistan Cricket Board ka la thmu ban pynlong ia ki artylli ki series kiba ka dei ban ialehkai ha la ri sha kiwei pat ki jaka kum ha UAE. Ka PCB ka la ia thuh ba ka England ka la tyrwa sngewbha ban pynlong ia ka test series kaba ka dei ban ialehkai pyrshah ia ka Australia la shem snem, bad ka don ruh ka jingthmu ban pynlong ia ka test series pyrshah ia ka New Zealand ha UAE. Ki thymmei khubor ki iathuh ba ka Pakistan ka kloi ruh ban leit ialehkai ia kane ka series bad ka New Zealand sha Newzealand hi. Ka Sharjah ka la pynlongteng ia 4 tylli ki test jong ka Pakistan..
Hynrei la thikna pat ba u Flintoff un nym lah ban iashim bynta ha ka test series pyrshah ia ka West Indies kaban sdang naduh ka 6 tarik u Jymmang.
Kiba bun na ki player barim jong ka England ki la pynpaw ia ka jingpyrshah jur ha kaba iadei bad ka jingpyllait jong ka England Cricket Board ia u Flintoff ban iashim bynta ha ka IPL wat haba ka la tip shai ba um don satia ha ka met kaba koit ba khiah krat pura. Ka jingmynsaw jong une u all rounder dang shen ka long ka jingduh kaba khraw ia ka team hi baroh kawei.
Une u player u la ngat ha ka jingmynsaw jan man la ka por. Naduh ba u ialam ia ka England ha ka jingshah rem da 0-5 ha ka Ashes Series 2006-07 pyrshah ia ka Australia, u Flintoff u la lah ban ialehkai tang ha ki 8 na ki 27 tylli ki test jong ka England.

Pyniaid u nong Spain ia ka team Hockey jong ka ri
NEW DELHI : Ia u Jose Brasa jong ka Spain la thung kum u coach ba thymmai jong ka kynhun Hockey ka India. U Brasa u la soi ia ka soskular ban pyniaid ia ka team haduh ka Asian Games 2010. U Brasa un pyniaid nyngkong eh ia ka team ha ka lympung iakhun Asia Cup kaban long ha Kuantan, Malaysia naduh ka 9 haduh 16 tarik mynta u bnai.
Ki thymmei khubor ki iathuh ba ka contract jong u Brasa ka long haduh ka Asian Games 2010 hynrei lah pat ban nang pynjlan shuh shuh lada ka team ka ialehkai bha hapoh ka jingpeit jingkhmih jong u.
U Brasa, uba yn iarap lem da u David Terez (Physical Trainer), un ioh ia ka jingsiew kaba long 84,000 euro ha ka shi snem,katba u Terez un ioh ia ka jingsiew kaba long 60,000 euros ha ka shi snem.
U Barsa u long uwei na ki coach ba paw bha ha ka pyrthei bad pynlah ruh ia ka team jong ki kynthei ka ri Spain ban jop ia ka takma ksiar ha ka Barcelona Olympic 1992
Kumban shu pyn kynmaw ba ka team hockey jong ka India kam don satia ia u coach uba thikna la jan shi snem mynta naduh ba ieh kam u Joaquim Carvalho ha u Lber mynshem snem hadien ba ka India kam shym la iohrung satia sha ka Olympic ha ka sien kaba nyngkong eh hapoh 80 snem.
U Ric Charle-worth u la shimti kum u technical adviser jong ka team shipor, hynrei u la iehnoh ia ka kam hadien ka jingia thut bad ki heh sorkar sports ka ri. Nangta ia ka kam coach la pynkhamti ha u Harendra Singh, bad hapoh ka jingpyniaid jong u ka India ka la poi phainal ha ka Punjab Gold Cup bad iohrah ruh ia ka Azlan Shah Cup ha Malaysia ha u bnai ba la lah.

Shongdor T.83 lak ka shi wicket jong u Flintoff
U Andrew Flintoff u la
ngat ha ka
jingmynsaw ha ka por ba ka England ka leit ialehkai sha West Indies bad ka la don ruh ka jingartatien la un iashim bynta ne em ha ka IPL. Kan jin da la bha shi katdei eh lada dei ba u kyrngah. Une u all rounder jong ka England u la shah thlieh jem ha kane ka lympung iakhun bad shim ruh tang artylli ki wicket na ki lai tylli ki jingia khun ha shuwa ba un myn-saw biang bad leit phai syndon sha la ri.
U Flintoff un jin da la ioh ia baroh ka bai ialehkai kaba long 1.55 million dolar lada u ialehkai pyndep ia baroh ki jingiakhun ha kane ka IPL kaba ar. Kat kum ka jingkhein ka jingsiew ia u ha kawei ka jingiakhun ka long 110,714 dolar bad ka jingioh jong u na ki lai tylli ki jingia khun kiba u la ialehkai ka long 332,143 dolar. Ki artylli ki wicket kiba la shim da ma u ki shongdor 166,000 ne T.83 lak kawei ka wicket. U Flintoff u la lah ruh ban shna tang 62 run na ki lai tylli ki jingiakhun kiba u la mih khmat na ka Chennai Super Kings mynta ka snem.
Jied hi u trai ia u Anil Kumble
** U trai jong ka team Royal Challengers Bangalore, u Vijay Mallya, u la iathuh ba ka dei ka rai kaba la shim hi da ma u ban pynkhamti ia ka kyrdan kapten ha u Anil Kumble hadien ka jingieh noh jong u Kevin Pietersen ia kane ka kam namar ba u hap ban leit ialehkai na la ri. Hapoh ka jingialam jong u Kumble, ka team Bangalore ka la kylla shisha ha kaba ka la iohmad ia lai tylli ki jingjop bad na ka liang u Mallya u sngew ba ka rai jong u ha kaba iadei bad ka jingthung kapten thymmai ka la iarap shisha ia ka team. Ha kaba iadei bad ka jingkiew kynsan jong ka team hapoh ka jingia lam jong u kapten uba thymmai, u Mallya u la kam ba ka team jong u ka don ia ka lad ban jop ia kane ka Indian Premiere League kaba ar.
Paw na la ri ym ha ka IPL
** Khlem artatien u Chaminda Vaas bad u Mashrafe Mortaza ki long ki arngut ki player kiba tbit bad kongsan eh jong ka Sri Lanka bad Bangladesh. Hynrei kaba sngewsih pat ka long ba kine ki arngut ki player kim shym la paw satia ha ka IPL bad haduh mynta hi ym pat iohi ba kin ioh ialehkai shisien ruh. Don jingkyrmen ba u Vaas un sa iohi hi ban ialehkai na ka team Hyde-rabad katba u Mortaza pat u hap ban ap lada don ba mynsaw napdeng ki bowler jong ka India ban ioh ialehkai na ka team Knight Ryders.
Lyngngoh u Nannes ba ioh ialehkai
** U fast bowler jong ka Australia u Dirk Nannes u la pynpaw ia ka jinglyngngoh halor ka jingshah jied jong u ban ialehkai na ka team Delhi Dare Devils ha ka jaka u Glenn McGrath. U Nannes u ong ba um lah ngeit satia ba ka team kan niew ia u ba u kham tbit ban ia u McGrath. U ong ba ka long kum ka kabu ksiar ban shah jied bad ioh ialehkai ha ka jaka jong u bowler (McGrath) uba kynsai eh ha ka history jong ka cricket. Na ka liang u kapten jong ka Dare Devils, u Virender Sehwag u la pyn paw ba u Nannes u long u bowler uba sted tam napdeng kiba u la ju ialehkai baroh.
Nyngkong u Raina ha ka liang ki batsman
** Ka 32 run kaba u Suresh Raina u la shna ha ka jingia khun kaba ka Delhi Dare Devils ka la pynliem ia ka Chennai Super Kings da 18 run ka la pynlong ia u u batsman uba nyngkong eh ban shna palat 650 run ha ka lympung iakhun IPL. U Raina, uba wan ba ar ha ka jingkamai bun eh ki run ha kane ka IPL kaba ar - 232 run na ki 36 tylli ki jingiakhun - u la shna mynta 653 run na ki 22 tylli ki jingiakhun IPL, kynthup ia ka jingiakhun kaba nyngkong bad kaba ar, ha ka average kaba long 38.41. Uba wan ba ar ha kane ka liang u dei u kapten jong ka Deccan Chargers, uba kamai 646 run na ki 20 tylli ki jingiakhun ha ka average kaba long 34.
Rung phainal ka Manchester United
LONDON : Ka Manchester United ka la iohrung biang sha ka phainal jong ka Champions League ha ka sien kaba ar ha ki arsnem lynter, hadien ba ka la lah ban pynliem ia ka Arsenal da 3-1 kol ha ka jingiakhun semi -final kaba ar kaba dang shu dep ialehkai shen ha Emirates Stadium. Ha shuwa ia kane ka United ka la jop ia ka semi -final kaba nyngkong ia kane ka juh ka team da 1-0. Bad haba khein kyllum lang ia ka jingjop jong ka ha kine ki semi final pyrshah ia ka Arsenal ka long da 4-1.
Ia ki kol kiba pynioh ia ka United ia ka jingjop ha kane ka semi final kaba ar (second leg) la thep da u Ji Sung Park bad ia artylli kiwei pat la thep da u Chris-tiano Ronaldo. Ka Arsenal ka la ioh ban pynphai kylla shi kol lyngba ka penalty.
Kane ka jingshah rem jongka Arsenal ka la pynkut noh ruh ia ka jingkyrmen ban iohrah ia ka trophy ha ka sien kaba nyngkong eh naduh ka 2005. Katba ka Manchester United pat, lyngba ki jingialehkai bha ha kine ki artylli ki semi final ka la ai mynsiem ia ka team ban jop biang ia ka Champions Trophy bad kylla long ruh ka team kaba nyngkongeh ban jop ia kane ka khusnam kaba heh eh jong ki club ha Europe arsien lynter ha ki arsnem.
Ha ka phainal ka Manchester United kan iakhun pyrshah ia ka team kaba jop na kawei pat ka semi final hapdeng ka Chelsea bad ka Barcelona.

Kyntait u Wenger ia ka jingtyrwa na ka Real Madrid
Ka la long thikna ba u manager jong ka Arse-
nal, u Arsene Wenger, un pyniaid shi rta ia kane ka club hadien ba u la kyntait ia ka jingtyrwa kaba long haduh 40 million pound na ka Real Madrid. Ki thymmei khubor ki iathuh ba la slem bah ka Real Madrid ka la pyrshang ban khring ia u Wenger. La iathuh ruh ba kane ka club jong ka Spain ka la tyrwa ia u Wenger ia ka contract kaba long san snem bad ba kan siew ruh ia ki bonus haman ba ka team ka jop ia ka Champions League bad ka Primera Liga (Spanish League). Bad lada khein kyllum ia ka jingsiew baroh kaba ka Real Madrid ka thmu ban ai ia u Wenger ka long haduh 8 million pound ha ka shi snem.
Hynrei u Wenger u la rai ban iai neh bad ka Arsenal bad ba u la mynjur ruh ban soi ia ka soskular kaba thymmai ban pyniaid ia kane ka club sa lai snem. Na ka liang ki nongpyniaid jong ka Arsenal ki kwah ba u Wenger un soi noh ia ka soskular namar ba ki sheptieng ioh ba un mih kyndit noh namar ba ka Real Madrid bad ka Bayern Munich (Germany) ki nang kthong ia u.
Khnang ba lah ban pynmynjur ia u Wenger ban neh bad ka club, ki nongpyniaid jong ka Arsenal ki la tyrwa ban mang kham bun ka pisa ha kaba iadei bad ka jingthied player thymmai, ia kaba u Wenger u la dawa la slem.
Tyrwa ka Manchester United 70m euro na bynta u Ribery
Kan long ka jingsiew kaba heh eh na ka bynta uwei u player ha ka history jong ka
jingia lehkai phutbol lada ka Bayern Munich ka mynjur ia ka 70 million euro kaba
ka Manchester United ka la tyrwa ban siew na ka bynta u Franck Ribery. Kane ka jingtyrwa jong ka Manchester United ka palat ia ka rikod kaba long 66 million euro kaba ka Real Madrid ka la siew ha ka por ba ka thied ia u Zinedine Zidane ha ka 2001 na ka Juventus. Ka jingthmu jong ka Manchester United ban khring ia u Ribery ka long ban pynap lypa lada jia ba u Ronaldo u leit iasoh noh bad ka Real Madrid.
Ki thymmei khubor ki iathuh ba u Ribery u la byrngem ban mih noh na ka Bayern Munich lada ka club ka duh iashim bynta ha ka Champions League ha ka aiom kaban sa wan. Kane ka club na Germany ka la pynpaw teng ruh ba ka kwah ban die noh ia une u nongialehkai midfield jong ka France, 26 snem ka rta.
Shi rta yn ialehkai u Rooney
LONDON : U Wayne Rooney u la smai ba un ialehkai shi rta na ka Manchester United bad kane ka rai jong u ka la pynsngewbha shi katdei ia ki nongkyrshan ba shit rhem jong kane ka club. U Rooney uba wan iasoh bad ka United na ka Everton ha ka 2004 kaba long 26 million pound, u dang hap ban ialehkai na kane ka club sa lai snem, hynrei u la iathuh ba u kloi ban soi ia ka soskular kaba thymmai ban pynjlan shuh shuh ia ka por ialehkai jong u na kane ka club. U ong ba u kmen ha kane ka club bad ba u kwah ruh ban iai neh shi rta bad ka. U la iathuh ruh ba u kloi ban soi ia ka soskular ban pynjlan ia ka por ialehkai jong u ha kano kano ka por ba ka club ka tyrwa.U Rooney u la jan kot artad sha ka 250 sien ba u la ioh mih khmat na kane ka club bad u kyrmen skhem ban tam ia ka rikod jong u Paul Scholes bad u Ryan Giggs, kiba la mih khmat ia kane ka club ha ki 600 bad 800 tylli ki jingiakhun.
Kwah die ia u Van der Vaard
MADRID : Ka Real Madrid ka kwah ban die kyrkieh ia u Rafael Van der Vaard bad tyrwa ruh sha ka Chelsea ha ka dor 8 million pound. Ka Madrid ka kyrmen skhem ba u coach jong ka Chelsea u Guus Hiddink u mynjur noh kloi ban pynrung ia u Van der Vaard. Ka Liverpool, Arsenal bad Everton ki long kiwei pat ki club Premiere League kiba kwah ban thied ia une u nongialehkai sha khmat uba dang 26 snem ka rta..

Nga long kaba kynsai tam ha ka pyrthei : Serena
ROME : Ka Serena Williams ka niew ia lade kum ka player tennis kaba kynsai tam ha ka pyrthei wat haba ka la shah knieh noh ia ka kyardan nyngkong ha ka Dinara Safina jong ka Russia.
Ha ka jingiakhun bad ki nongthoh kot khubor ha Italy dang shen, ka Serena ka la pynpaw da kaba ong ba baroh ki player ki tip mano ba dei shisha ka no.1 player ha ka pyrthei. Ka ong ba kaba pynlong ia ka ban kam ba ka dei ka nongialeh kai kaba don hok ban bat ia ka kyrdan kaba nyngkong ba ka la lah shisha ban jop haduh 10 tylli ki Grand Slam haba ia nujor bad ka Safina kaba ym pat ju jop wat tang kawei ruh. Haba kylli ruh na ka iano ba ka niew ba ka long kata ka nongaireng pyrshah kaba shyrkhei eh jong ka, ka la jubab da kaba ong ba ka dei ma ka hi.
Ka Safina ka la kyntait mardor ia ka jingkyn-noh jong ka Serena ba kam long satia kaba dei hok ban bat ia kata ka kyrdan nyng-kong ha ka pyrthei. Ka Safina ka la ong ba ka Serena ka la nud ban kren kumne tang namar ba ka jop kham bun ki Grand Slam.
Ka Safina ka la ong ruh ba kan iai pyrshang bad trei shitom ban iai neh ha kane ka kyrdan. Ha ki 12 bnai kiba la lah ka Safina ka la iakhun haduh 11 tylli ki phainal bad jop saw tylli bad dei na kane ka daw ba ka sa ioh ban knieh ia ka kyrdan nyngkong na ka Serena.
Yn ioh 10 m dolars bad tiket liengsuin ki team Formula One ba thymmai
LONDON : Ka Formula One kan ai ei 10 million dolars bad ki tiket liengsuin ia baroh ki team thymmai kiba yn wan iashim bynta ha kane ka lympung iakob race kali la shem snem.
Lai tylli ki team thymmai yn shah ban iashim bynta ha kane ka lym-pung iakob ha ka snem kaban wan bad ka jingdon jong ki kan kyntiew ia ka jingbun ki kali ha kane ka sports sha ka 26 tylli ne palat 6 tylli ban ia kiba don mynta.
Ka bor kaba dei peit bad pyniaid ia kane ka jingialehkai, ka FIA ka la buh dor ruh 40 million pound ia ki team ban pynlut ha kane ka sports ha ka shi aiom.
Ka FIA ka la pynbna ruh yn ym shah ban pyndap petrol biang ne refuling ia ki kali ynda la sdang ka race bad kane kan treikam naduh ka 2010.
Ka Formula One Management Limited kan ai ei 20 tylli ki tiket liengsuin ha ka Economy class ia baroh ki team thymmai ha man ba ka race ka long shabar ka dewbah Europe bad kan iarap ruh ban pynkit ei ia ki kali bad ia ki jingdon-kam jong ki team baroh.
Hynrei kiba bun na ki 10 tylli ki team kiba aireng ha ka Formula mynta ki la pynpaw ba kim lah satia ban pynduna ia kajingpynlut jong ki sha ka 40 million pounds ha ka snem kaban wan. Kum ka nuksa ka team Renault ka pynlut haduh 160 million dolars bad ia kane la pynthikna da u heh duh jong kane hi ka team, u Flavio Briatore.

 
NEWS OPTIONS ::
>> EMAIL THIS ARTICLE
>> PRINTER FORMAT
>> LETTER TO EDITOR

 
[Home] [The Sentinel] [Ajir Asom] [The Sentinel(Hindi)] [Samay Prabah] [Khubor Jylla] [Editorial] [Ki Sports] [Train Timmings] [Flight Information] [Classified]
[Cinema] [Archives] [Feedback] [About Us]
 
Copyright © 2001 Omega Printers and Publisher, Guwahati.